Emino : حكاية رابور خلى بصمة في تونس

مروان الدويري، AKA Emino، رابور تونسي ولد منوبة، تولد نهار 23 سبتمبر 1990، بدا غرامه بالموزيكا و الراب كي كان عمره 9 سنين، و في عام 2003 دخل لعالم الراب مع جروبات اما الحكاية ماطولتش و بعد عامين قرر يبدى مسيرته الفنية وحده اللي خدم فيها الالبوم “مجاهدين”، الالبوم اللي ما عمره ما شاف النور و ما عمره ما خرج من الستوديو، المسيرة الفنية اللي ماكنتش طويلة و تقصت عام 2006 كي بعد Emino على الراب لأسباب شخصية
حكاية الغرام و الحب متع الموزيكا، حكاية ماتنجمش تكمل هذاكا علاش رجع بعد عام بخدمة أقوى و انظف، خدمة صحيحة و مخدومة بالباهي، و بارول واقعي و صحيح، Emino ماكانش يخاف من الميكروفون بالعكس عمل برشا فري ستايل مع برشا عباد، حاجات كيف هكا ساهمت بنسبة كبيرة بش الرابور هذا يتعرف و يكسب جمهور
2009 خرج اول البوم رسمي مع فوني، لحقتها في 2010 خدمة صحيحة مع لطفي العبدلي خلاته يدخل للنجومية، و في نفس العام صار اول كونسار خاص بيه في قاعة الفن الرابع في شارع باريس.
حتى لين جا 2011 و صارت الثورة ، Emino رفض بش يشد ثنية الرابورات الكل و يستغل الأحداث اللي صايرة و قرر بش يكمل يعوم عكس التيار .. و كمل خدم باش يطور في ثقافة الهيب-هوب و كان من القلائل لي عندهم علاقات سمحة مع برشا رابورات و مع برشا قروبات و عاون برشا رابورات صغار باش ينتجوا .
و بدات التقلبات تضرب حياة Emino من تاريخ 21 فيفري 2012 وقت وقع القبض عليه و تحاكم بتهمة ” استهلاك مادة مخدرة ” هو و ثمنية اشخاص أخرين نذكروا منهم Weld el 15 و Madou MC ، و أمضى Emino مدة تسعة شهور في سجن المرناقية أو “سويسرا ” كيما يقول هو .
و زاد الوضع تأزم مع شهر سبتمبر 2013 وقت تحكم مروان غيابيا بعاميين حبس خاطر تذكر اسمو في Dédicace في غناية “البوليسية كلاب” لولد الكانز.
بعيد على أنو الغناية عملت buzz كبير و تطورت ولات قضية رأي عام و دخلت في اطار سلب حرية التعبير في بلاد مازالت تخطوا في اول خطواتها بعد ثورة ضد نظام قمعي.
المتغيرات لي صارت لEmino غيرت في تفكيرو و توجهاتو و مبادئو و أثرت حتى على اللغة المستعملة في اغانيه … من Wanted، haka yemchi lba7th و غيرهم ، تبدلت الكلمات و المواضيع ، ولى Emino يحكي كان عالحبس و القانون الظالم و ولينا نفهموا اللي التوجه بدا يقرب خطوات نحو المغادرة في اقرب فرصة و السعي نحو نهاية كيف نهاية “صدام حسين” .

 https://youtu.be/Iooatt704XU

نهاية مسيرة Emino كانت في حفلة في باريس ، الاومور كانت عادية و العباد كانت تستنى في برشا رابورات باش تطلع في الScène لين طلع مروان لابس كوفية و أعلن انو تخلى نهائيا عن الراب و من وقتها غاب عن الساحة.
العودة كانت موش متوقعة ، أما موش بالراب. نهار 18 مارس 2015 , امينو في البروفيل الرسمي متاعو يعلن مبايعتو لابو بكر البغدادي و انظمامه لتنظيم الدولة . صدمة كانت للناس لي تعرفو و لي تبع فيه ، و كل بريود كنا نسمعوا بخبر عليه عبر وسائل التواصل الاجتماعي و الفيديوات .

 

و في 17 افريل 2017 ,صرح الصحفي هادي يحمد على موجات اذاعة موزاييك خبر وفاة مروان بعد غارة جوية في منطقة الموصل و تبقى كل الاحتمالات واردة في ظل غياب تأكيد من وسائل اعلام تنظيم الدولة .
رغم هذا الكل Emino مازال حي ، حي بموزيكتو و فنو ، حي بغناياتو و ابداعاتو اللي مست قلوب الناس لي تابعت و عاشت معاه هالمسيرة الموش عادية لأنسان اقل ما يتقال عليه ” موهبة نادرة ” في وقت كثرت فيه استعمال صفة رابور.

ويبقى السؤال : شنوا كان يصير لو تونس ما قتلتش طموح مروان و غيروا ؟ كيفاش تكون وضعية الراب في تونس ؟